Dulu Mano Garik Pado Garak? Catatan Budaya : Pinto Janir

Nan tampak-tampak, ijan dibaok lalu bana. Nan indak tampak, usah sampai dilengahkan pulo. Nan tahambek landasan mato,adaiknyo salero.  Nan tapandang landasan hati,adaiknyo raso.  

Adaik iduik batanyo, adaik pudua ditanyo. Jalan surang indak sandiri , jalan basamo manjadi suluah panarang jo palapang hati.  

Nyampang adoh saganggam usah disisokan. Barikan. Kok tatingga  nan sabinjek, usah ditinggakan. Agiahan.  

Ba-a baitu? 

Karano,adaik saganggam mangarati, adaik sabinjek mamahami.

Hiduik sampilik babilik sampik. Hiduik kasiah babiliak sayang.   

Nan kuek makanan bidik, nan lamah makanan ibo. Caliak ka ateh mamandang langik.Caliak ka bawah mamandang bumi.Caliak mandata mamandang mungko. 

Nan duduak jo panduduak-annyo. Nan tagak jo panagak-annyo. Duduak nan indak duduak,sapantun jo nan taduduak. Tagak nan indak tagak samamang jo salero tageh di tungkek nan guyah.

Sabalun tungkek mambaok rabah, molah tungkekkan ujuang lidah ka langik-langik. Hati nan barasiah asahan lidah, ujuangnyo nan indak malukoi, sampainyo nan indak marabahkan. Lidah manggarik dek tagarak, di sinan mangko parintah sampai. 

Namun baitu, iduik nan sabana-bana iduik indak kasalai-salasai. Tapi, pasti sampai !

Sampainyo,sampai mano? Sampai nan tingga hanyo “tampek” nan tasuo hanyo “adoh” . Saat nan tun, mungkin sajo wakatu “mambatu” tapi taruih bajalan tiado hanti. 

Ba-a ?

Kalau baitu, cubo batanyo sakali waktu, mano nan dulu garik pado garak?

Garik nan tagak di batin,garak nan tagak di lahia. 

Partanyaan nan ko bukan untuak dimangarati. Sabalun manjawek, arak sado diri ka tampek nan  saba-bana sunyi. 

Sahinggo,  bunyi nan tadanga takah manutuik duo lubang talingo. Sirih jan dikunyah,tambakau jan disalai. Lapehkan salapeh-lapehnya pangana duya. Pikiran saparintah “awak” .Hati saparintah “Nan Bana”. Kalau langkah saparintah garik, di sinan kaji mangkonyo duduak.

Kabek pangana jo raso, bia inyo indak lala kamano mano. Kabek salero jo malu, bia inyo indak kahilangan mungko. 

Kalau pangana lapeh kabek dari raso,salero putuih kabek dari malu, mangko na tajadi adolah hiduik malato. Di mano, duo tangan manjadi panupang kaki.Kok talapak tangan lah bantuak talapak kaki, di sinan molah hino jo malang manjadi pakaian diri. 

Mandanga kato jan jo bunyi. Sabab, indak salamonyo nan kareh tu kuek,indak salamonyo pulo nan lunak tu lamah. Kadang-kadang,ujuang dari tangih tu galak. Ujuang galak baurai aia mato. Kadang,ujuang dari mandapek tu kahilangan, ujuang dari kahilangan tu mandapek. Mangkonyo, mangkaji sampai “taujuang”. 

Muaro dari sagalo “nan taujuang” tu adolah sakik kapalo.  Jiwa nan rusak tu dek karano acok bapikia katikok  kapalo sadang sakik. Sadang manganak-nganak.  Dalam tangkurak kapalo nan  sakik tadapek pangana nan rusak. 

Rusak pangana, rusak  jiwa. Rusak jiwa,rusak raga.Sangsaro batang tubuh. Dalam jiwa nan rusak tadapek pikiran nan kumuah ,hati nan karuah. 

Kalau iko tajadi, apo nan haruih dilakukan?

Ambiak uduak, baok sumbahyang; basarah diri ka Nan Kuaso. 

--Salam Budaya; Pinto Janir/ Kembangan Jakarta 15.23 ;19 Juni 2026--